Бүсгүй...

...Инээмсэглэл, энэ гоо үзэсгэлэн чамд зориулагдаагүй
Ихэмсэг харц, энхэр бие чинийх болохгүй
Хагацашгүй мөрөөдлийн ханхүү чи биш
Ханатал амталсан дурлалын дарсыг чи исгээгүй.

...Хэзээ ч юм бэ биш, яг одоо холдож одох

Хээнцэр сэтгэл, ганган алхаа хайрынх биш

Хэлээгүй, хэлэхгүй цоожтой зүрхэнд

Хэний ч мэдэхгүй ямархан гал дүрэлздэгийг

...харин бүсгүй л ...

/ Бодрол бүсгүйн блогийг .../

...

...тэнэг би, ухаангүй
тэгээд юу ч болоогүй юм шиг
тэнүүн инээмсэглэл нүүр дүүрэн.
...бодол биш, шунал хэр нь
бүүр жаргалтай байх шиг
болгоомжгүй алхам дандаа урд.

Тэр

...таавар таалгаж, толгой эргүүлдэг ч

танхи, гэнэн, томоогүй төрхтэй
...тэргүүн өндөр, харц ихэмсэг
тэгээд инээмсэглэл нь хүүхдийнх...

...санаад байна.

Илхэн нүдэнд ч, далдхан хүсэлд ч
Чи харагдаад
Инээж баясавч, илүүдэж гүнивч
Чамайг бодоод
Сэрвэгнэх зүүдэнд ч, сэрүүн бодолд ч
Чамаар дутаад
Сэлүүн үдшээр ч, гэгээн өдрөөр ч
Чамайг үгүйлээд...

...би түүний...

...Сэтгэлийн талд, сэмхэн
Сэрхийх хөнгөн сэвшээ
Зүрхний тольтонд, хааяахан
Зурвас гялбах гэгээ







...Алжаалын үзүүрт үесхэн
Анзаарч, үгүйлэх амт
Адгаж, уйдахад дүрсхэн
Амилах дулаан сэтгэл.

...Нэг л...

...Нулимсан дусал олон гэлээ ч
Нэг л инээмсэглэлд тайтгарч, хатдаг.
Нууцхан гуних гашуун гэлээ ч
Нэг л үгэнд тайлагдаж, сарнидаг.
...Чимээгүй хүлээх шаналан гэлээ ч
Нэг л харцанд тайвширч, жаргадаг.

Чамайг үгүйлэх тэвчишгүй гэлээ ч
Нэг л учралд хөглөгдөж, зоригждог.

...гайхширал

...би хэн бэ...
би хаачина вэ...
баяр гуниг минь хаанаас ундрана ?
бардам сэтгэл минь хааш одоо вэ...
...хэзээ эхэлж, хаана дуусах
юуны төлөө би бэдрэнэ?
хэнд итгэж, хэрхэн эцэслэх
юм бүхэн юу ч биш эсэх...