Харамсалтай нь

...Чивчирсэн хүслэн, гал ноцоох харц гэлээ ч
Чин сэтгэл, зөөлөн хайрын дуудлага биш.
Чи өөрөө дур булаам, сайхан эр хүн гэвч
Чанад зүрхний, ганц тавилангийн эзэн биш ээ.

Зуны нугад...

Хөгжилтэй цэцэгст инээдээ нэмэрлэчихээд
Хөхрөх униараар нүдээ угаачихаад
Харуусал гунигаа салхинд дайж нисгээд
Харин өөрөө шүүдэр болчихсон...
Нарны гэрэлд солонгорон гялбаад
Намайг жаргалдаа бялууран байхад
Чи, тэнд, шүүдэр туучаад,,, нүцгэн хөлөнд чинь
Чийг болж би шингэчихсэн, чи мэдээгүй...

...үр минь...

...Жижигхэн гараас хөтлөөд
Жирийн бус яриаг амтархан сонсоод
Зүгээргүй анализ хийж сургаал хайрлаад
Зүггүйхэн нүд нь ямархан гэгээтэйг гайхширч
...Энхрий үрээ хайрлаж, эрхлүүлж
Эгнэгт дэргэд нь л баймаар
Ээжээ гэж дуудах хоолойноос
Эгшиг яруу нь гэж үгүй юм аа...
...Жаахан, жаахан, жаахан үр минь
Жаргал хайрласан наран минь
Санаад л, санаад л, санаад л байна.
Сажлах өдрүүд өнгөрч өгөхгүй юм...

...мөрөөднөм...

...Хамтдаа алхахад холд хөтлөх хос харгуйг
Халуун хүйтэнд хатуужиж давах хоёргүй итгэлийг
Харыг цагаанаар сүлж чадах хонгор сэтгэлийг
Хан хорвоод амт нэмэх хувиршгүй жаргалыг
...Ширтээд суухад халуу дүүгэх нүдний илчийг
Ширүүлэх өнгөгүй дандаа намуун дотно үгсийг
Хором бүрийг нандигнаж хуваалцах тэр мэдрэмжийг
Хоногийн урсгалд улам нялхрах тунгалаг хайрыг...

E-д...

Над руу ингэж бүү ширтээ, залуу минь
Наалинхай бус ихэмсэг бардам байв чиг
Наанаа чамайг тоогоогүй дүр эсгэвч
Наранд цэцэг тэмүүлэх шиг
… хаширсан сэтгэл минь уярах гээд байна.
Намайг идэвхтэй бүү эргүүлээ, залуу минь
Наадам тоглоомын завсар хавчуулсан үгэнд чинь
Эгдүүрхэж, тохуурхаж хэнэггүйхэн хариу барьдаг ч
Эр хонгор сэтгэлийн чинь халуун илчинд
…эмзэгшсэн зүрх минь хайлах гээд байна.