...Нэгэн шүлэг

Алдвал ч алдаг ээ, миний гал халуун нас
Ахиад би ямар залуу явах биш дээ
Хорин тав хүрчихлээ гэж
Гомдоллохоо болъё
Хор шар атаа хорслын цаана
Насаа нууж явъя
Дураараа л гэлцдэгсэн, идэр залуу насыг минь
Дурсамжнаас уур юу үлдэх юм бэ?
Задгай гэзэг эрх чөлөөнөөс минь
Юндаа бишүүрхээв
Замын уртад үүнээс өөр
Хань болсон нь үгүй ээ
Оо энгэсэгээр гоёхын хэрэг байгаагүй
Одоо бол харин гоочлохын хэрэг байхгүй
Ай миний гал халуун нас
Ганцаар өнгөрөөсөн мөч болгоны төлөө
Гараан дэрлэж хоносон шөнө болгоны төлөө
Дундуур үлдсэн хундага болгоны төлөө
Дурлалаас нь татгалзсан хөвгүүдийн төлөө
Чиний өмнө, би буруутай

... Р.Эмүжин

...

...Туулах амьдралд
Тулах цэг минь
Эхлэх цэг минь
Очих цэг минь

...Дураараа сэтгэлийн
Дулаахан эмзэглэл минь
Дундрашгүй чадал минь
Дүүрэн жаргал минь

...Зүтгэх итгэлийн
Зоргоороо ундрага минь
Зөөлхөн гуниг минь
Зөндөөн их хайр минь...


... Гүнж минь.

Бороо

...Уужран дотор цэлмэнэ
Урин, цэнгэг урсгалд.
Усан дусал бөмбөрөх
Урдах зам өнгөлөг...
...Алхаа хөнгөрөн сэвэлзэнэ
Агаар шунаглан сороход.
Амьсгал гүнд шингэж
Амьдрал амт орох...

...Түүнд

... Зүгээр нэг хүлээх биш
Зүрх минь элэгдэхийг
Зүгээр нэг нойр хулжих бус
Зөн минь төөрөхийг
...Өнгөрөх хормын тоогоор
Өөрөөс минь чи ууршиж
Дусал дуслаар гээгдэж дундрахыг
Дуугүйхэн харж сууж

... тэсэшгүй нь.

...Найман тоо дарж залгах эрх
Надад байхгүй.

Эгшсэн гомдлоо нулимсаар угаамаар ч
Инээдээр далдалдаг
Гэлдрэх хоногуудад ганцаар бүдрэвч
Гэнэгүйхэн ухааждаг.

Сэтгэлээ хэлхэж зурвас илгээх зүрх
Чамд үгүй...

...Нүдээ би анихыг хүснэ...
Нүглийг, хүслийг, нууцыг
Нэвт харагдуулахгүйн тулд
Нимгэн зовхины цаана далдлахыг хичээнэ...

...Хөвнөм би, хайр байдагт итгэж.
Хөл доорх шавхайд хальт гишгэсэн ч...
Хөгжүүн зангаа хаа нэгтээ гээсэн ч...
Хүүхэд ахуй шигээ ханхүүгээ хүлээмээр.
...Жиргэнэм би, зүгээр л баясаж.
Жаахан охин шиг цурхиртал уйлчихаад
Жижигхэн өрөөндөө ганцаараа бүжиглэчихээд
Жилээр биш хормоор амьдармаар...

...

...Инээмсэглэл нүдэнд минь гэрэлтэж
Энгүүн өглөөг жаргалтай угтавч
...Нарны илч мянган цацрагаар дутуу
Намираа бороо түмэн дуслаар ядуу



...Чамайг үгүйлээд

...

...Таван жилийн өмнө тасарч болох
Тасархай шугам, амьдрал
Үргэлжлэхийн учир...
...Тас хар бэх цаасан дээр буух
Тайтгарал минь, шүлэг
Үргэлж хамт...

...Үүрд!?

...Таны нүдэнд би өнгөлөг харагдаж.
Танхил, эмзэг, эмэгтэйлэг үзэгдэж.
Энхрийлмээр, хайрламаар, хамгаалмаар санагдаж.
Энэ чинь харин, хэр удах бол?!

Цоож...

...Ганцаардлаа би зүрхнийхээ гүнд
Цоожилчихсон...
Гань ганцаараа сууж л байг.
...Гансарч, ганцаардаад, гаргачихвал
Цоччихно...
Ганц үр минь.

...ээжээ та...

Эгэлээс эгэл
Эргэлдэх өдөр хоногуудын
Өмнө нь биш ард нь чирэгдэж
Өнхөрч явааг минь
...зэмлэхсэн.
Гэхдээ

Эрэвгэр үрийг минь
Энхрийлж, надаас олон үнсэх
Дэндүү хайранд тань нялхарч
Дандаа би, гэнэн явахсан...

Ээжээ, та
Энд, дэргэд минь байвал...

...

Гар, амьсгал, хөдөлгөөн чинь

Ганц дутагдал, тамхи татах чинь

Галзууруулах нь...

Тэвэрт чинь шөнөжин эрхэлсэн ч

Тэнэг хайр, тэсгэлгүй хүсэл

Дундрашгүй нь...